📰 शिक्षणमंत्र्यांच्या हस्ते ‘Chalk and Dream’ व ‘Echoes of Wisdom’ पुस्तकांचा गौरव!
शिक्षक व विद्यार्थ्यांसाठी उपयुक्त असलेल्या पुस्तकांच्या लेखक शिक्षकाचे कौतुक
मुंबई (विशेष प्रतिनिधी उदय नरे): ‘शिक्षकाची प्रेरणा, विद्यार्थ्यांचे भविष्य उज्वल करणारा दीप!’ अशी विलक्षण भूमिका वठवणारे ज्ञानप्रकाश विद्यालय, घाटकोपरचे सहाय्यक शिक्षक आणि लेखक श्री. रविंद्र आनंद सपकाळे यांच्या Chalk and Dream व Echoes of Wisdom या दोन प्रेरणादायी पुस्तकांचा सन्मान महाराष्ट्र राज्याचे शालेय शिक्षण मंत्री नामदार दादाजी भुसे यांच्या शुभहस्ते नुकताच करण्यात आला.
श्री. सपकाळे यांच्या कार्याचा गौरव करताना, शिक्षकी व्यक्तिमत्त्वांची नाविन्यपूर्ण जडणघडण आणि सत्यशोधाचा प्रवास समाजासमोर आला.
- ‘Chalk and Dream’ या पुस्तकात, एक शिक्षक प्रतिकूलतेशी झुंज देत विद्यार्थ्यांना शिक्षणाच्या प्रवाहात आणण्यासाठी नवनव्या योजनांची आखणी व प्रेरणादायी उपक्रम राबवतो, ही संघर्षगाथा अत्यंत हृद्य आणि आशयपूर्ण रीतीने मांडली आहे.
- दुसरे पुस्तक ‘Echoes of Wisdom’ हे लेखकाच्या अनुभवातून आणि मनस्पर्शी कथांमधून प्रेरणा घेणारे संकलन असून, वाचनानंतर वाचकांना समाजात काहीतरी चांगले करावे, अशी तीव्र ऊर्मी निर्माण करणारे आहे.
सत्कार सोहळा आणि उपस्थिती
या गौरवपूर्ण क्षणी लेखकाचे सहप्रवासी म्हणून शिक्षक मित्र श्री. सुरेश जाधव सर आणि श्री. गणेश जाधव सर उपस्थित होते. सदर भेटीचे आयोजन महाराष्ट्र राज्य शिक्षक-शिक्षकेत्तर सेनेचे राज्यउपाध्यक्ष श्री. ज्ञानदेव हांडे सर यांनी केले. त्यांनी शैक्षणिक कार्य वाटचालीस शुभेच्छा दिल्या.
या यशवेध प्रवासात संस्था अध्यक्ष श्री. सावंत साहेब, मुख्याध्यापिका सौ. टेकाडे मॅडम, पर्यवेक्षिका सौ. गोरले मॅडम, सहकारी शिक्षक, पालक आणि विद्यार्थ्यांचे सहकार्य हा आधार ठरल्याचे श्री. सपकाळे यांनी सांगितले.
लेखकाचे मनोगत
“ज्ञानदानाच्या या पवित्र यज्ञात सर्वांच्या सहकार्याने विद्यार्थ्यांचे आयुष्य उज्ज्वल करण्याचे प्रयत्न अखंडपणे सुरु राहोत,” असे उद्गार श्री. रविंद्र आनंद सपकाळे यांनी यावेळी मनोगत व्यक्त करताना काढले.
शिक्षण मंत्री महोदयांच्या कौतुकाने प्रोत्साहित झालेल्या श्री. सपकाळे यांनी, अथक कार्यात दिसणारे समर्पण, नवचैतन्य, आणि सामाजिक बांधिलकी शैक्षणिक क्षेत्रातील सर्वांसाठी दीपस्तंभ ठरले असल्याचे प्रतिपादन केले.
