खिंडी व्हरवडेतील ‘ओमसाई’ हॉटेलवर एक्साईजचा छापा; ११ जणांवर गुन्हे दाखल
कोल्हापूर (प्रतिनिधी):
मौजे खिंडी व्हरवडे (ता. राधानगरी) येथील ‘हॉटेल ओमसाई’वर कागल राज्य उत्पादन शुल्क विभागाने धाड टाकून बेकायदेशीर दारू विक्रीचा पर्दाफाश केला आहे. या कारवाईत हॉटेल मालकासह एकूण ११ जणांवर गुन्हे दाखल करण्यात आले असून, देशी-विदेशी मद्यसाठ्यासह १२ हजार २४५ रुपयांचा मुद्देमाल जप्त करण्यात आला आहे.
नेमकी घटना काय?
मिळालेल्या माहितीनुसार, खिंडी व्हरवडे येथील ओमसाई हॉटेलमध्ये अनधिकृतपणे दारूची विक्री आणि पिण्याची सोय केली जात असल्याची माहिती राज्य उत्पादन शुल्क विभागाला मिळाली होती. या माहितीच्या आधारे कागल पथकाने छापा टाकला. यावेळी हॉटेल मालक अनिल (आण्णा) दादू पाटील (रा. कौलव, ता. राधानगरी) यांच्यासह मद्यप्राशन करणाऱ्या व बेकायदेशीर विक्रीला मदत करणाऱ्या इतर १० जणांवर कारवाई करण्यात आली.
पुन्हा पुन्हा नियमभंग
विशेष म्हणजे, हॉटेल मालक अनिल पाटील हा सराईत असून यापूर्वीही त्याच्यावर अशाच प्रकारची कारवाई करण्यात आली होती. मागील वेळी न्यायालयाने त्याला २५ हजार रुपयांचा दंड ठोठावला होता, तर तेथे मद्यप्राशन करणाऱ्या ग्राहकांना प्रत्येकी १५०० रुपये दंड करण्यात आला होता. तरीही पुन्हा हा बेकायदेशीर व्यवसाय सुरू असल्याने प्रशासनाने आता कडक पावले उचलली आहेत.
कारवाई करणारे पथक
ही धडक कारवाई राज्य उत्पादन शुल्क कोल्हापूर विभागीय उप-आयुक्त विजय चिंचाळकर, जिल्हा अधीक्षक स्नेहलता श्रीकर-नरवणे व उपअधीक्षक युवराज शिंदे यांच्या मार्गदर्शनाखाली करण्यात आली. कागल विभागाचे निरीक्षक शंकर आंबेरकर यांच्या नेतृत्वाखालील पथकात दुय्यम निरीक्षक रमेश चंदुरे, प्रशांत नागरगोजे, जवान सचिन काळेल, अमर पाटील आणि लक्ष्मण येडगे यांचा समावेश होता.
सध्या सर्व आरोपींना समजपत्र देण्यात आले असून, गुन्ह्याचा पुढील तपास निरीक्षक शंकर आंबेरकर करत आहेत. या कारवाईमुळे परिसरातील अवैध दारू विक्रेत्यांचे धाबे दणाणले आहेत.
