कोल्हापुरात ‘समृद्धीसाठी सत्यनिष्ठा’ संकल्पनेवर आधारित दक्षता जनजागृती सप्ताह संपन्न
कोल्हापूर : भ्रष्टाचाराविरुद्ध जनजागृती करण्याच्या उद्देशाने केंद्रीय सतर्कता आयोग, नवी दिल्ली यांच्या निर्देशानुसार आणि राज्य शासनाच्या मार्गदर्शनाखाली कोल्हापूर लाचलुचपत प्रतिबंधक विभागातर्फे दिनांक २६ ऑक्टोबर २०२६ ते ०१ नोव्हेंबर २०२६ या कालावधीत ‘दक्षता जनजागृती सप्ताह’ मोठ्या उत्साहात पार पडला. यावर्षी “समृद्धीसाठी सत्यनिष्ठा” (Probity for Prosperity) ही मुख्य संकल्पना डोळ्यांसमोर ठेवून हा सप्ताह साजरा करण्यात आला.
कार्यक्रमाची प्रभावी सुरुवात व शपथविधी
सप्ताहाची सुरुवात २६ ऑक्टोबर २०२६ रोजी सकाळी ११.०० वाजता ताराराणी सभागृह, कोल्हापूर येथे झाली. निवासी उप जिल्हाधिकारी गजानन गुरव यांच्या हस्ते उपस्थित शासकीय अधिकारी व कर्मचाऱ्यांना भ्रष्टाचार निर्मूलनाची शपथ देण्यात आली. तसेच, महाराष्ट्र राज्याचे माननीय राज्यपाल व माननीय मुख्यमंत्री यांनी पाठवलेल्या संदेशाचे वाचन उपस्थितीमध्ये करण्यात आले. लाचलुचपत प्रतिबंधक विभाग, कोल्हापूरच्या पोलीस उपअधीक्षक वैष्णवी पाटील यांनी कार्यक्रमाचे प्रास्ताविक केले. याप्रसंगी महसूल, पोलीस आणि उपप्रादेशिक परिवहन (RTO) कार्यालयातील अधिकारी व कर्मचारी मोठ्या संख्येने उपस्थित होते.
विविध उपक्रमांद्वारे व्यापक जनप्रबोधन
कोल्हापूर शहर तसेच जिल्ह्यातील सर्व १२ तालुक्यांमध्ये लाचलुचपत प्रतिबंधक विभागाने विविध उपक्रमांच्या माध्यमातून नागरिकांपर्यंत पोहोचून प्रबोधन केले:
- शाळा-महाविद्यालयांमध्ये संवाद: सायबर कॉलेज, कमला महाविद्यालय, मौनी विद्यापीठ (गारगोटी), बळीराजा अकादमी (गंगापूर), राजर्षी शाहू कॉलेज (रूकडी), कल्लेश्वर ज्युनिअर कॉलेज (कसबा बीड), के.आय.टी. कॉलेज (गोकुळ शिरगाव), डी.आय.टी. कॉलेज, विठ्ठल पाटील कॉलेज (कळे), रावसाहेब यशवंतराव चव्हाण कॉलेज (हलकर्णी) आणि म.ह. शिंदे कॉलेज (तिसंगी) यांसारख्या विविध विद्यालये व महाविद्यालयांमध्ये विद्यार्थ्यांच्या बैठका घेऊन त्यांना भ्रष्टाचाराविरुद्ध तक्रार करण्याचे आवाहन करण्यात आले व पत्रके वाटण्यात आली.
- घरोघरी व संस्थात्मक संपर्क: जिल्ह्यातील स्वयंसेवी संस्था, महिला बचत गट, कामगार संघटना, वाहन चालक-मालक संघटना आणि एम.आय.डीसी. मधील कारखानदारांच्या प्रतिनिधींची भेट घेऊन शासकीय योजनांचा लाभ घेताना येणाऱ्या अडचणी व लाचेच्या मागणीबाबत चर्चा करण्यात आली.
- माध्यमांचा प्रभावी वापर: आकाशवाणी कोल्हापूर केंद्र, एफ.एम. रेडिओ, स्थानिक न्यूज चॅनेल्स, केबल नेटवर्क्स, व्हॉट्सॲप ग्रुप्स आणि युट्यूबच्या माध्यमातून विभागाची कार्यपद्धती व तक्रार करण्याचे आवाहन प्रसारित करण्यात आले.
नागरिकांसाठी संपर्क क्रमांक आणि आवाहन
लाचलुचपत प्रतिबंधक विभागातर्फे शासकीय कार्यालयांमध्ये आणि सार्वजनिक ठिकाणी टोल फ्री क्रमांक १०६४ तसेच मोबाईल क्रमांक ९४०४३२१०६४ व मोबाईल ॲपबाबत माहिती देणारे स्टिकर्स लावण्यात आले व पत्रके वाटण्यात आली.
भ्रष्टाचारासंबंधित कोणतीही माहिती किंवा लाच मागणाऱ्या लोकसेवकाविरुद्ध तक्रार असल्यास नागरिकांनी खालील क्रमांकांवर संपर्क साधावा, असे आवाहन लाचलुचपत प्रतिबंधक विभागाच्या वतीने पोलीस उपअधीक्षक वैष्णवी पाटील, पोलीस निरीक्षक राजेंद्र सानप आणि पोलीस निरीक्षक उज्ज्वला भडकमकर यांच्या पथकाने केले आहे:
- टोल फ्री क्रमांक: १०६४
- कार्यालयाचा पत्ता: पोलीस उपअधीक्षक कार्यालय, लाचलुचपत प्रतिबंधक विभाग, कोल्हापूर, २१२० सी वार्ड, शनिवार पेठ, कोल्हापूर – ४१६००२
- दूरध्वनी क्रमांक: ०२३१-२५४०९८९
- व्हॉट्सॲप क्रमांक: ९४०४३२१०६४ / ९७६४१४०७७७
- ई-मेल आयडी: dyspacbkolapur@gmail.com
