रत्नागिरी : संगमेश्वर तालुक्यातील तुरळ गुरववाडी येथे घराशेजारी उभी असलेली बोलेरो मॅक्स गाडी आणि रिकामे सिलेंडर पळवून नेल्या प्रकरणी दोन जणां विरूध्द गुन्हा दाखल करून अटक करण्यात आल्याची माहिती संगमेश्वर पोलीस ठाण्यातुन प्राप्त झाली आहे.याबाबत संगमेश्वर पोलीस स्थानकातून मिळालेल्या माहितीनुसार, याची तक्रार दत्ताराम धोंडू लिंगायत (४५, देवरुख) यांनी दिली आहे. यावरून पोलिसांनी पवन उदयकुमार मिरकर (३०, जाकी मिऱ्या रत्नागिरी) आणि अमित शंकर खडसोडे (३८, झारणी रोड रत्नागिरी) यांना अटक केली आहे.
या घटनेत दत्ताराम लिंगायत यांनी दिलेल्या तक्रारीनुसार त्यांची महिंद्रा कंपनीची मॅक्स गाडी क्रमांक एमएच ०४ ई वाय १५६६ या गाडीमध्ये ६५ रिकामे सिलिंडर ठेवण्यात आले होते.
गाडी आणि हे सिलेंडर ८ जानेवारी रोजी सकाळी दहा वाजण्याच्या सुमारास तुरळ गुरववाडी येथील लिंगायत यांच्या वडिलोपार्जित घराशेजारुन नेण्यात आले. ही गाडी आणि सिलेंडर हे त्या फायनान्स कंपनीच्या लोकांनी नेले असावे असे लिंगायत यांनी पोलिसांना संगितले. त्या नंतर संगमेश्वर पोलिसांनी याचा शोध घेतला असता फायनान्स कंपनीच्या आवारात असल्याचे दिसून आले. लिंगायत यांनी संगमेश्वर पोलीस ठाण्यात तक्रार दाखल केल्या नंतर संगमेश्वर पोलिसांनी या दोघांच्या विरोधात गुन्हा दाखल केला. याबाबत आलेल्या तक्रारीवरुन पोलीस निरीक्षक उदय झावरे यांच्या मार्गदर्शनाखाली सहाय्यक पोलीस फौजदार चंदू कांबळे, सचिन कामेरकर,बाबुराव खोंदल, अनिल म्हैसकर यांनी संबंधित ठिकाणी जावून हा मुद्देमाल जप्त केला.
त्यानंतर या दोघांना बुधवारी सकाळी अटक केली आहे. फायनान्स कंपनीचे काही हप्ते थकल्या मुळे कंपनीने गाडी उचलली असल्याचं समजते.
