सिंधुदुर्ग : सदाशिव पवार गुरुजी स्मृती प्रतिष्ठानचा पहिला राज्यस्तरीय सरस्वती लक्ष्मण पवार काव्य पुरस्कार सामाजिक कार्यकर्त्या आणि कवयित्री दिशा पिंकी शेख यांना जाहीर करण्यात आला आहे. असे प्रतिष्ठानचे अध्यक्ष डॉ. सतीश पवार यांनी सांगितले आहे. हा पुरस्कार वितरण सोहळा मंगळवार दिनांक 1 मार्च 2022 रोजी कणकवली येथील मातोश्री मंगल कार्यालय येथे सायंकाळी 4:30 वाजता संपन्न होणार आहे.
तृतीयपंथी म्हणून गणल्या गेलेल्या आणि समाजव्यवस्थेने नेहमीकज अमानवीय वागणूक दिलेल्या हिजडा समूहाचे दुःख आणि वेदना मांडणाऱ्या दिशा पिंकी शेख यांची कविता आपल्या भवतालचा एक क्रूर चेहरा आपल्याला दाखवते. तळाशी फेकल्या गेलेल्या वर्गाला सर्वसामान्यांशी जोडून घेणारा दिशा पिंकी शेख यांचा “कुरूप” हा काव्यसग्रंह या सन्मानाचा सर्वार्थाने योग्य आहे. जेष्ठ लेखक उचल्याकार लक्ष्मण गायकवाड यांच्या हस्ते हा पुरस्कार प्रदान करण्यात येणार आहे. रोखरक्कम दहा हजार रुपये आणि स्मृतिचिन्ह असे पुरस्काराचे स्वरूप आहे.
सदर पुरस्कार प्रदान सोहळ्याला जेष्ठ लेखिका वैशाली पंडित यांना प्रमुख पाहुणे म्हणून निमंत्रित करण्यात आले आहे. तसेच जेष्ठ पत्रकार विजय शेट्टी , समाजसेवक संदीप परब,स्त्रीरोगतज्ञ डॉ. शमिता बिरमोळे यांच्या प्रमुख उपस्थित हा पुरस्कार प्रदान सोहळा संपन्न होणार असून साहित्य रसिकांनी या पुरस्कार प्रदान सोहळ्याला उपस्थित राहावे, असे आवाहन प्रतिष्ठानच्या सचिव शुभांगी पवार यांनी केले आहे.
