चिपळूण मधील खेरडी ग्रामपंचायत मध्ये घेण्यात आलेल्या मेळाव्याच्या अध्यक्षा गट प्रवर्तक स्वाती वरवडेकर या होत्या. या मेळाव्यासाठी चिपळूण तालुक्यातील किमान 250 आशा गटप्रवर्तक महिला उपस्थित होत्या.या मेळाव्यामध्ये बोलताना महाराष्ट्र राज्याच्या आशा गटप्रवर्तक व आरोग्य कर्मचारी संघटनेच्या राज्य जनरल सेक्रेटरी कॉ सुमन पुजारी यांनी सुरुवातीस सर्व आशा व गटप्रवर्तक महिलांना नववर्षाच्या हार्दिक शुभेच्छा दिल्या. नवीन वर्षामध्ये आशा व गटप्रवर्तक महिलांच्या उज्वल भवितव्यासाठी जोरदार संघर्षाची तयारी करा यासाठी जिद्द व निर्धारणे आपले आंदोलन मजबूत करा असेही आवाहन केले.
याप्रसंगी बोलताना त्यांनी सांगितले की सर्व आशा व गटप्रवर्तक महिलांना शासकीय कर्मचाऱ्यांचा दर्जा व वेतन मिळाले पाहिजे. जोपर्यंत शासकीय कर्मचाऱ्यांचा दर्जा व वेतन मिळत नाही तोपर्यंत आशा व गटप्रवर्तक महिलांना दरमहा पंचवीस हजार रुपये किमान वेतन मिळाले पाहिजे. या महत्त्वाच्या मागणीसाठी पुढील काळामध्ये जोरदार आंदोलनाची तयारी ठेवा असे त्यांनी आवाहन केले.
यानंतर बोलताना आशा व गटप्रवर्तक संघटनेचे अध्यक्ष व राष्ट्रीय उपाध्यक्ष कॉ शंकर पुजारी यांनी सांगितले की, सध्या देशामध्ये दहा लाखापेक्षा जास्त आशा व गटप्रवर्तक महिलांची संख्या आहे महाराष्ट्रामध्ये आशा व गटप्रवर्तक मिळून 70हजार महिला काम करीत आहेत. मागील तीन वर्षापासून भारत सरकारने आशा व गटप्रवर्तक महिलांच्या मोबदल्यामध्ये काहीही वाढ केलेली नाही. त्यामुळे सध्या आशा व गटप्रवर्तक महिलांना दररोज आठ तासापेक्षा जास्त वेळ काम करूनही कामाचा मोबदला अत्यंत कमी मिळतो. म्हणूनच हा मोबदला त्वरित दुप्पट केला पाहिजे. आणि भारत सरकारने आशा व गटप्रवर्तक महिलांना फिक्स पंचवीस हजार रुपये किमान वेतन दिलं पाहिजे. या महत्त्वपूर्ण मागणीसाठी लवकरच नवी दिल्ली पार्लमेंटवर मोर्चा काढण्यात येणार आहे. तसेच ज्या कामाचा मोबदला आशा व गटप्रवर्तक महिलांना मिळत नाही ते काम त्यांनी अजिबात करता कामा नये. आशा कामाची कोणी सक्ती केल्यास संघटनेस त्वरित कळवावे असेही आवाहन त्यांनी केले.
हा महत्त्वपूर्ण मेळावा यशस्वी करण्यामध्ये उपाध्यक्षा वैष्णवी तांबट, सचिव साक्षी चव्हाण, सायली जाधव, ललिता राऊत, श्रद्धा जबरे,संदीप मोहिते, संजना मोरे, वर्षा मोहिते, नेवरेकर, नीता पेवेकर, प्रतिक्षा खेडकर, प्राजक्ता सुर्वे, वृषाली साळवी, प्रतीका शिंदे, इत्यादींनी महत्त्वपूर्ण भागीदारी केलेली आहे.
