मद्य वाहनासह सव्वा सहा लाखाचा मुद्देमाल जप्त
राज्य उत्पादन शुल्क बारामती विभागाची कारवाई
अमोल कुरणे
कोल्हापूर, दि. २० (प्रतिनिधी) राज्य उत्पादन शुल्क बारामती विभागाच्या पथकाने बारामती तालुक्यातील हॉटेल ब्रह्मचैतन्य शेजारी वंजारवाडी गावच्या हद्दीतून बनावट विदेशी मद्य विक्रीचे रॅकेट पकडले. बनावट मद्या सह चार चाकी वाहन असे एकूण ६ लाख २२ हजार ८०० रुपयांचा मुद्देमाल जप्त करण्यात आला.
बारामती एक्साईज डिव्हिजन चे इन्स्पेक्टर शहाजी शिंदे यांनी ही कारवाई केली. त्यांच्या पथकाने वंजारवाडी गावच्या हद्दीत भिगवण बारामती रस्त्यावर हॉटेल ब्रह्मचैतन्य जवळ पाळत ठेवून एका संशयिताची मारुती सुझुकी स्विफ्ट डिझायर गाडी थांबवून तपासणी केली असता, त्यामध्ये रॉयल स्टॅग व्हिस्की व इम्पेरियल ब्ल्यू व्हिस्कीचे बनावट मद्य आढळून आले. १८० मि.ली. चे पाच बॉक्स या चार चाकीतून जप्त करण्यात आले.
महाराष्ट्र दारूबंदी कायद्याने वाहन व मद्य बॉक्स जप्त करण्यात आले. या गुन्ह्यातील आरोपी अमोल सदाशिव शिंदे (व.व. – ३८ रा. देवळाली ता. करमाळा जि. सोलापूर) याला अटक करण्यात आली आहे.
ही कारवाई उत्पादन शुल्क हडपसरचे उपअधीक्षक उत्तम शिंदे यांच्या मार्गदर्शनाखाली निरीक्षक शहाजी शिंदे, दुय्यम निरीक्षक सागर साबळे, दुय्यम निरीक्षक गिरीशकुमार कर्चे, प्रदीप झुंजरुक, मयूर गाडे, सहायक दुय्यम निरीक्षक गणेश जाधव, जवान निखिल देवडे, सुरेश खरात, सागर दुबळे, संकेत वाझे, डी.जे. साळुंके यांनी केली. पुढील तपास दुय्यम निरीक्षक सागर साबळे करत आहेत.
