राजारामपुरीत राज्य उत्पादन शुल्क विभागाचा छापा; पावणेतीन लाखांचे अवैध मद्य जप्त
एकास अटक : महानगरपालिका निवडणुकीच्या पार्श्वभूमीवर कोल्हापूर एक्साईजची मोठी कारवाई
कोल्हापूर | प्रतिनिधी
कोल्हापूर महानगरपालिकेच्या मतदानाची प्रक्रिया सुरू असताना, शहरात अवैध मद्याचा पुरवठा रोखण्यासाठी राज्य उत्पादन शुल्क विभागाने (एक्साईज) मोठी कारवाई केली आहे. राजारामपुरी परिसरात टाकलेल्या छाप्यात गोवा व महाराष्ट्र बनावटीच्या मद्यासह एकूण २ लाख ७६ हजार ७५० रुपयांचा मुद्देमाल जप्त करण्यात आला असून एका आरोपीला अटक करण्यात आली आहे.
नेमकी कारवाई काय?
राजारामपुरीतील दुसऱ्या गल्लीत एका घरामधून अवैध मद्यविक्री होत असल्याची गोपनीय माहिती एक्साईज विभागाला मिळाली होती. या माहितीच्या आधारे पथकाने शुक्रवारी संबंधित घरावर छापा टाकला. या कारवाईत विदेशी मद्य, बिअर आणि गावठी हातभट्टी असा एकूण ३१ बॉक्सचा मोठा साठा हस्तगत करण्यात आला.
जप्त करण्यात आलेला मुद्देमाल:
- गोवा बनावट मद्य: १८० मि.ली.च्या १९६ बाटल्या.
- महाराष्ट्र बनावट मद्य: १८० मि.ली.च्या ५१९ बाटल्या आणि ७५० मि.ली.च्या ४२ बाटल्या.
- बिअर: ६५० मि.ली.च्या १४४ बाटल्या.
- हातभट्टी: २८० लिटर गावठी हातभट्टी दारू.
आरोपीवर गुन्हा दाखल
या प्रकरणी विपूल चंद्रकांत पाटील (वय ३४, रा. २ री गल्ली, राजारामपुरी) याला जागीच अटक करण्यात आली आहे. त्याच्यावर महाराष्ट्र दारूबंदी कायदा १९४९ अंतर्गत विविध कलमान्वये गुन्हा नोंदवण्यात आला आहे.
यांनी केली कारवाई
ही धडक कारवाई राज्य उत्पादन शुल्क आयुक्त डॉ. राजेश देशमुख, विभागीय उपआयुक्त विजय चिंचाळकर, जिल्हा अधीक्षक स्नेहलता नरवणे आणि उप-अधीक्षक युवराज शिंदे यांच्या मार्गदर्शनाखाली पार पडली.
कारवाईत शहर निरीक्षक रोहिदास वाजे, हातकणंगले निरीक्षक महेश गायकवाड, दुय्यम निरीक्षक सत्यवान भगत, शिवाजी गायकवाड, सहाय्यक दुय्यम निरीक्षक एम. आर. लाडके आणि जवान राहुल गुरव, गणेश सानप, प्रसाद पाटील, पंकज खानविलकर, सागर शिंदे, सुशांत बनसोडे व पुष्कराज शिर्के यांनी सहभाग घेतला. या गुन्ह्याचा पुढील तपास दुय्यम निरीक्षक सत्यवान भगत करत आहेत.
”निवडणूक काळात शांतता व सुव्यवस्था राखण्यासाठी बेकायदेशीर मद्यसाठा व विक्रीवर आमचे विशेष लक्ष आहे. अशा प्रवृत्तींविरुद्ध कडक कारवाई सुरूच राहील.”
— राज्य उत्पादन शुल्क विभाग, कोल्हापूर
निवडणूक काळात सक्रिय झालेल्या मद्यमाफियांवर या कारवाईमुळे जरब बसली असून, नागरिकांमधून एक्साईज विभागाच्या या तत्परतेचे स्वागत होत आहे.
