पंतप्रधान मोदी आणि देवेंद्र फडणवीस यांच्या नेतृत्वाखालील जनहितकारी योजना घराघरात पोहचवा; संजय दादा पाटील यांचे आवाहन
नवे दानवाड (प्रतिनिधी):
दत्तवाड जिल्हा परिषद मतदारसंघातील भारतीय जनता पार्टीच्या अधिकृत उमेदवार सौ. मृणालीराजे सुशांत पाटील आणि पंचायत समितीचे उमेदवार हरिचंद्र पाटील यांच्या प्रचारार्थ नवे दानवाड येथे बौद्ध समाजाची महत्त्वाची बैठक उत्साहात पार पडली. यावेळी भाजपा नेते संजय दादा पाटील यांनी उपस्थितांना मार्गदर्शन करताना, केंद्र व राज्य सरकारच्या योजनांचा लाभ तळागाळातील घटकांपर्यंत पोहोचवण्यासाठी दोन्ही उमेदवारांना भरघोस मतांनी निवडून देण्याचे आवाहन केले.
विकासाच्या मुख्य प्रवाहात वंचितांना स्थान
संजय दादा पाटील पुढे म्हणाले की, “पंतप्रधान नरेंद्र मोदी आणि राज्यात मुख्यमंत्री देवेंद्र फडणवीस यांच्या खंबीर नेतृत्वाखाली भाजपा सरकारने सर्वसमावेशक विकासाचे धोरण राबवले आहे. अन्न सुरक्षा, प्रधानमंत्री आरोग्य योजना, उज्ज्वला गॅस, घरकुल आणि किसान सन्मान यांसारख्या योजनांनी सामान्यांचे जीवन सुसह्य केले आहे. विशेषतः ‘लाडकी बहीण’ आणि महिला सक्षमीकरण योजनांच्या माध्यमातून माता-भगिनींना आर्थिक बळ दिले जात आहे.”
ते पुढे म्हणाले की, उपेक्षित, वंचित आणि दलित समाजाला सामाजिक न्याय मिळवून देण्यासाठी सरकारने अनेक महत्त्वाकांक्षी पावले उचलली आहेत. असंघटित आणि बांधकाम कामगारांच्या कल्याणासाठी शासन कटिबद्ध आहे.
सर्वांगीण विकासाचे आश्वासन
मृणालीराजे पाटील आणि हरिचंद्र पाटील यांना निवडून दिल्यास मतदार संघात खालील कामांना प्राधान्य दिले जाईल असे आश्वासन यावेळी देण्यात आले:
- मूलभूत सुविधा: दर्जेदार रस्ते, गटारी आणि स्वच्छतागृहांची निर्मिती.
- सामाजिक विकास: दलित वस्ती सुधारणा योजनांची प्रभावी अंमलबजावणी आणि सांस्कृतिक भवनांची उभारणी.
- आरोग्य व शिक्षण: ग्रामीण भागात उत्तम आरोग्य सेवा आणि शैक्षणिक सुविधांचे सक्षमीकरण.
मान्यवरांची उपस्थिती
यावेळी शेतमजूर संघटनेचे नेते सुरेश सासने, पँथर आर्मीचे संस्थापक प्रमुख संतोष आठवले आणि माजी सरपंच प्रकाश परीट यांनी आपली मनोगते व्यक्त करत उमेदवारांना पाठिंबा दर्शवला.
या बैठकीस पिंटू माळी, प्रकाश बेरड, समीर विजापुरे, अक्षय कदम, नितीन घावट यांच्यासह बौद्ध समाजातील महिला आणि कार्यकर्ते मोठ्या संख्येने उपस्थित होते. मतदारसंघाच्या सर्वांगीण विकासासाठी ‘कमळ’ चिन्हासमोरील बटण दाबून महायुतीच्या उमेदवारांना विजयी करण्याचा निर्धार यावेळी कार्यकर्त्यांनी व्यक्त केला.
