इंटरनॅशनल रेकॉर्डची हॅट्रिक आणि आता नशामुक्तीचा जागर! ‘विखारातून विजयाकडे’चे पोस्टर पुण्यात लाँच होणार.
पुणे : पत्रकारितेतील आपल्या परखड लेखणीने आणि ‘प्रति अत्रे’ म्हणून नावलौकिक मिळवलेले प्रेस मीडिया लाईव्हचे मुख्य संपादक मेहबूब सर्जेखान आता एका नव्या आणि धगधगत्या सामाजिक लढाईसाठी सज्ज झाले आहेत. इंटरनॅशनल ‘वर्ल्ड बुक रेकॉर्ड’ची हॅट्रिक साधणाऱ्या सर्जेखान यांनी आता आपला मोर्चा समाजाला पोखरणाऱ्या व्यसनाधीनतेकडे वळवला आहे. ‘नशामुक्त भारत’ अभियानाचा भाग असलेल्या ‘विखारातून विजयाकडे’ या लघुपटाचे पोस्टर लवकरच पुण्याच्या पवित्र भूमीत लाँच होणार आहे.
व्यसनांच्या विखाराला गाडण्याचा निर्धार!
आजची तरुण पिढी अंमली पदार्थांच्या दलदलीत फसलेली असताना, हातावर हात धरून बसणे हा सर्जेखान यांचा स्वभाव नाही. “व्यसनांचा विखार संपवून तरुणांना विजयाची नवी पहाट दाखवणे,” याच निर्धाराने ‘एम. एस. प्रॉडक्शन’ च्या माध्यमातून हा लघुपट आकाराला येत आहे. केवळ स्थानिक नव्हे, तर जागतिक स्तरावर या विषयाची धग पोहोचवण्याचा हा एक प्रामाणिक आंतरराष्ट्रीय प्रयत्न आहे.
‘रप्पाटा’ची ताकद आणि विशेष साथ!
या लघुपटाच्या पाठीशी ‘रप्पाटा’ या गाजलेल्या मराठी चित्रपटाचे निर्माता आणि दिग्दर्शक यांची मोलाची साथ लाभली आहे. त्यांच्या तांत्रिक कौशल्यामुळे आणि मार्गदर्शनामुळे हा लघुपट रसिक आणि प्रेक्षकांच्या काळजाला थेट भिडणार, यात शंकाच नाही!
सांस्कृतिक वसा आणि सामाजिक बांधिलकी
ज्यांनी आपल्या शब्दांनी अनेकांना जागे केले, तेच मेहबूब सर्जेखान आता कॅमेऱ्याच्या माध्यमातून समाजाला नवी दिशा देत आहेत. या लघुपटात प्रसिद्ध अभिनेते महम्मद रफिक मांगुरे आपल्या दमदार अभिनयाने मुख्य भूमिका साकारत आहेत. जागतिक विक्रमांचे शिखर सर केल्यानंतर, आता एका सामाजिक महायुद्धाला त्यांनी सुरुवात केली आहे.
चित्रीकरणाचा रणसंग्राम पश्चिम महाराष्ट्रात!
या महत्त्वाकांक्षी लघुपटाचे चित्रीकरण लवकरच पश्चिम महाराष्ट्राच्या मातीत सुरू होणार आहे. नशामुक्त भारताचा हा जागर केवळ एका पडद्यापुरता मर्यादित न राहता, ती एक प्रभावी लोकचळवळ ठरेल, अशी खात्री निर्माते सर्जेखान यांनी व्यक्त केली आहे.
