शाहुपूरी पोलीस ठाण्यातील महिला पोलीस उपनिरीक्षक २५ हजारांची लाच घेताना रंगेहात जाळ्यात; आणखी २५ हजारांची मागणी केल्याचे उघड

शाहुपूरी पोलीस ठाण्यातील महिला पोलीस उपनिरीक्षक २५ हजारांची लाच घेताना रंगेहात जाळ्यात; आणखी २५ हजारांची मागणी केल्याचे उघड
कोल्हापूर: शाहुपूरी पोलीस ठाण्यातील महिला पोलीस उपनिरीक्षक अपर्णा सुखदेव जाधव यांना २५,००० रुपयांची लाच स्वीकारल्याप्रकरणी आणि आणखी २५,००० रुपयांची बेकायदेशीर मागणी केल्याप्रकरणी लाचलुचपत प्रतिबंधक विभागाने (ACB) गुन्हा दाखल करून ताब्यात घेतले आहे. या कारवाईमुळे पोलीस वर्तुळात प्रचंड खळबळ उडाली आहे.

नेमके काय घडले?

या प्रकरणातील मूळ तक्रारदारावर शाहुपूरी पोलीस ठाण्यात एक गुन्हा दाखल आहे. या गुन्ह्याचा तपास पोलीस उपनिरीक्षक अपर्णा जाधव यांच्याकडे होता. तक्रारदार अटकेत असताना, त्याला तपासात आणि जामीन मिळवून देण्यासाठी मदत करण्याच्या बदल्यात जाधव मॅडम यांनी लाचेची मागणी केली होती. त्यानुसार तक्रारदाराच्या वडिलांनी आरोपी जाधव यांना २५,००० रुपये दिले होते.
तक्रारदार जामिनावर बाहेर आल्यानंतर, जाधव मॅडम उर्वरित लाचेच्या रकमेची मागणी करणार असल्याचे लक्षात येताच तक्रारदाराने थेट कोल्हापूर लाचलुचपत प्रतिबंधक विभागाकडे (ACB) रीतसर तक्रार नोंदवली.

पडताळणीत गुन्हा निष्पन्न

एसीबीने केलेल्या पडताळणी दरम्यान, अपर्णा जाधव यांनी तक्रारदाराच्या वडिलांकडून यापूर्वी २५,००० रुपयांची लाच स्वीकारल्याचे मान्य केले. तसेच, तक्रारदाराकडे स्वतःसाठी आणखी २५,००० रुपयांची बेकायदेशीर लाच मागितल्याचेही निष्पन्न झाले. यावरून आरोपी अपर्णा सुखदेव जाधव (मूळ रा. हातनोळी, ता. तासगाव, जि. सांगली; सध्या रा. कळंबा, कोल्हापूर) यांच्याविरुद्ध शाहुपूरी पोलीस ठाण्यात गुन्हा दाखल करण्यात आला आहे.

एसीबीची धडक कारवाई

सदरची धडक कारवाई लाचलुचपत प्रतिबंधक विभाग, पुणे परिक्षेत्राचे पोलीस अधीक्षक श्री. शिरीष सरदेशपांडे, अप्पर पोलीस अधीक्षक श्री. अर्जुन भोसले आणि कोल्हापूर एसीबीच्या पोलीस उपअधीक्षक वैष्णवी पाटील यांच्या मार्गदर्शनाखाली करण्यात आली. कारवाईमध्ये पोलीस निरीक्षक उज्वला भडकमकर, प्रकाश भंडारे, सहायक पोलीस उपनिरीक्षक संदीप काशीद, पोलीस हेडकॉन्स्टेबल संगिता गावडे, सचिन पाटील, पोलीस नाईक संदीप पवार व इतर अंमलदारांनी सहभाग घेतला.

नागरिकांना आवाहन

कोणत्याही शासकीय अधिकारी किंवा कर्मचाऱ्याने कामासाठी लाचेची मागणी केल्यास अथवा अपसंपदेबाबत माहिती असल्यास नागरिकांनी खालील क्रमांकांवर संपर्क साधावा, असे आवाहन एसीबीने केले आहे:

• टोल फ्री क्रमांक: १८००२२२०२१ / १०६४
• पुणे एसीबी कार्यालय: ०२०/२६१२२१३४
• पोलीस उपअधीक्षक, कोल्हापूर (वैष्णवी पाटील): ९४०४३२१०६४ / ९७६४१४०७७७
• व्हॉट्सॲप क्रमांक: ९४०४३२१०६४