रत्नागिरी : किरकोळ कारणातून माय-लेकीला शिवीगाळ करत लाथा-बुक्क्यांनी मारहाण केल्याप्रकरणी एकाच कुटुंबातील तिघांविरोधात शहर पोलिस ठाण्यात गुन्हा दाखल करण्यात आला आहे. मारहाणीची ही घटना 3 डिसेंबर 2021 रोजी रात्री 10 वा.रेल्वे कॉलनीतील रस्त्यावर घडली होती. अश्रुबा तांदळे, अनुराधा तांदळे,रेश्मा तांदळे (सर्व रा.रेल्वे कॉलनी नर्मदा बिल्डिंग,रत्नागिरी) अशी गुन्हा दाखल करण्यात आलेल्या संशयितांची नावे आहेत. त्यांच्याविरोधात ज्योती दीपक गांगरकर(39,रा.रेल्वे कॉलनी शरावती बिल्डिंग,रत्नागिरी) यांनी गुरुवार 24 फेब्रुवारी रोजी शहर पोलिस ठाण्यात तक्रार दिली आहे. त्यानुसार, ज्योती गांगरकर यांची मुलगी अस्मिता हिने रेश्मा तांदळे इन्स्टाग्रामवर आपली बदनामी करत असल्याचे आपल्या आईला सांगितले होते. तेव्हा ज्योती गांगरकर यांनी आपल्याला वाद करायचे नाहीत तू तिच्या आईला जाऊन विचार असे सांगितले. त्याप्रमाणे अस्मिता ही अनुराधा तांदळेला सांगण्यास गेली असता तिने अस्मिताला मारु लागली. तेव्हा अस्मिताला सोडवण्यासाठी तिची आई ज्योती मध्ये पडली असता अश्रुबा तांदळे, अनुराधा तांदळे आणि रेश्मा तांदळे या तिघांनीही ज्योती आणि अस्मिताला शिवीगाळ करत लाथा-बुक्क्यांनी मारहाण केली. तसेच तुम्हाला जिवंत सोडणार नाही, अशी धमकीही दिली. याप्रकरणी अधिक तपास महिला पोलिस हवालदार नाडणकर करत आहेत.
रत्नागिरीत माय-लेकीला मारहाण; तीन जणींवर गुन्हा
