जालना : देवेंद्र फडणवीस यांनी नुरा कुस्ती खेळू नये. त्यांनी तेल लावलेल्या पैलवानासारखं मैदानात यावं. ते सध्या खेळत असलेल्या नुरा कुस्तीतून काहीही साध्य होणार नाही. त्यांना कुस्तीच खेळायची असेल तर त्यांनी मैदानात यावं, असं आव्हान वंचितचे अध्यक्ष प्रकाश आंबेडकर यांनी दिलं आहे.
प्रकाश आंबेडकर आज जालना जिल्ह्याच्या दौऱ्यावर आहेत. या दौऱ्यात त्यांनी विविध मुद्द्यांवरुन पत्रकारांशी संवाद साधला. यावेळी त्यांनी राज्याच्या राजकारणातील महत्त्वाच्या विषयांवर जोरदार फटकेबाजी केली. फडणवीसांना नुरा कुस्तीतला पैलवान व्हायचंय की खऱ्या अर्थाने तालमीतल्या पैलवानासारखी कुस्ती खेळायची हे त्यांनी ठरवावं, असा टोला आंबेडकरांनी लगावला.
औरंगाबादमध्ये आज प्रकाश आंबेडकर यांची सभा आयोजित करण्यात आली आहे मात्र या सभेला पोलिसांनी परवानगी नाकारली आहे. दरम्यान जालन्यातील कार्यक्रम संपल्यानंतर मी औरंगाबादला जाणार असून तिथे गेल्यानंतर कार्यकर्त्यांशी चर्चा करून तेथील सभा घ्यायची की नाही याबाबत निर्णय घेतला जाणार असल्याचं प्रकाश आंबेडकर यांनी म्हटलं आहे.ते जालन्यात बोलत होते.
विरोधी पक्षनेते देवेंद्र फडणवीस यांनी आजही सभागृहात विधानसभा अध्यक्षांना एक पेन ड्राईव्ह दिला. त्यांनी सभागृहात नुसती नुरा कुस्तीच खेळायची का? असा सवाल आंबेडकरांनी केला. तसंच फडणवीस खेळत असलेल्या नुरा कुस्तीतून काहीही निष्पन्न होणार नाही. त्यांनी जो पेन ड्राईव्ह विधानसभा अध्यक्षांना दिला आहे तो जर फॉरेन्सिक लॅबला गेला की तो फेक आहे, असाच रिपोर्ट येणार आहे. त्यामुळे हा पेन ड्राईव्ह जनतेसमोर आणावा जेणेकरुन फडणवीस यांची नुरा कुस्ती न होता खऱ्या अर्थाने तालमीतल्या पहेलवानासारखी त्यांची कुस्ती होईल, असंही आंबेडकर म्हणाले.
फडणवीस आणि भाजपने सभागृहात नुरा कुस्ती न खेळता तेल लावलेल्या पैलवानासारखी मैदानात कुस्ती खेळावी, असंही आव्हान त्यांनी दिलं. फडणवीस यांनी पेनड्राईव्ह जनतेसमोर आणल्यास सिक्रेसी कायद्याचं उल्लंघन बिल्कुल होणार नाही, असंही प्रकाश आंबेडकर म्हणाले.
