जवाहर साखर कारखान्यामार्फत सुरू लागण आणि ऊस उत्पादकता वाढ याविषयावर ऊस पिक परिसंवाद
हुपरी -जवाहर साखर कारखान्यामार्फत ऊस उत्पादक सभासद व शेतक-यांच्यासाठी कोथळी कुपानवाडी ता. चिक्कोडी येथील देशभूषण गुरुकूल येथे सुरू लागण आणि ऊस उत्पादकता वाढ या विषयावर ऊस पिक परिसंवाद आयोजीत केला होता. या परिसंवादाच्या अध्यक्षस्थानी कारखान्याचे व्हाईस चेअरमन बाबासाहेब चौगुले होते. तर संचालक सर्वश्री सुमेरू पाटील, शितल आम्मण्णावर, व्ही. एस. आय. चे वरीष्ठ शास्त्रज्ञ डॉ. रमेश हापसे, डॉ. जे. एम. रेपाळे, मुख्य शेती अधिकारी किरण कांबळे, उपमुख्य शेती अधिकारी भास्कर पट्टणकुडे, सिनीयर अॅग्री ओव्हरसियर अनिल चौगुले, बोरगाव विभाग जवाहर साखर कारखाना स्टाफ आदी उपस्थित होते. प्रास्ताविकामध्ये मुख्य शेती अधिकारी किरण कांबळे यांनी, कमी पाण्याच्या भागात कारखान्याद्वारे सुरू ऊस लागवडीकरिता शिफारस केलेल्या जातीचे ऊस बियाणे, रासायनिक खते, औषधे तसेच शेतक-यांना मार्गदर्शन व प्रबोधन ऊस विकास योजनेच्या माध्यमातून दिले जात असलेचे सांगीतले. या परिसंवादात प्रमुख मार्गदर्शक डॉ. रमेश हापसे यांनी, ऊस लागणीकरिता जमिनीची चांगली मशागत, एकरी २५ बैलगाडया शेणखत किंवा कंपोस्ट खत, लागणीकरिता योग्य ऊस जातीची निवड ऊसाचे ९ ते १० महिन्याचे सशक्त व निरोगी बियाणे, सुपर कैन नर्सरी द्वारे ऊस रोपांची लागवड, वेळेवर बेसल व भरणी डोस, सुक्ष्म अन्नद्रव्यांची फवारणी आणि ठिबकसंचाद्वारे दररोज दोन तास व आठवड्यातून एकदा पाटपाणी आवश्यकतेनुसार दिल्यास सुरू ऊस लागणीचे तसेच आडसाली, पूर्वहंगामी व खोडवा ऊस पिक उत्पादनात २० टक्के बाद सहज शक्य असलेचे सांगीतले. शेतामध्ये असणारे पाघट, वाळलेले तण, ऊसाचा पाला इ. प्रत्येक वस्तूत शेंद्रीय कर्ब असून त्याला आपण शेतामध्येच कुजविणे आवश्यक आहे. ताग, ध्येंच्या ही हिरवळीची खते तसेच कडधान्ये पिके घेवून शेतातील सेंद्रीय कर्ब वाढविणे अत्यंत आवश्यक असून याद्वारे निर्माण झालेल्या जिवाणूंच्या सहाय्यानेच आपण दिलेली रासायनिक खते ही विघटन होवून ऊस पिकास मिळून ऊस उत्पादनात वाढ होत असेलेचे सांगीतले. यावेळी भागातील शेतकरी आणि कारखान्याचे सभासद मोठ्या संख्येने उपस्थीत होते.
