भारताचे खरेखुरे नाव खैरलांजी आहे काय ?

भारताचे खरेखुरे नाव खैरलांजी आहे काय ?

आज 29 सप्टेंबर म्हणजे आजच्या दिवसापासून 18 वर्षांपूर्वी देशाला हादरवून टाकणारी भारतीय संविधानातील समता, बंधुता, न्याय या तत्वांना तिलांजली देणारी घटना घडली ती भंडारा जिल्ह्यातील खैरलांजी या गावात.

२९ सप्टेंबर २००६ मध्ये खैरलांजीत माणूसकीला काळीमा फासणारे हत्याकांड घडले होते. घटनेच्या दिवशी गावातील दलितेतर समूहाने भोतमांगे यांच्या झोपडीला वेढा घातला आणि शिविगाळ केली. तसेच झोपडीत असलेल्यांवर हल्ला केला होता. जमावाने भैयालालची पत्नी सुरेखा, मुले प्रियंका, सुधीर आणि रोशन यांची अमानुषपणे हत्या केली होती. भोतमांगे यांचे कुटुंबच एका गटाने अमानुषपणे हत्या करून संपवून टाकले. तर भैयालाल शेतावर गेल्याने ते या हल्ल्यातून बचावले होते.

ही घटना समोर येताच दलितांच्या भावनांचा उद्रेक केवळ राज्यातच नव्हे तर देशभर झाला आणि देशभरातील राष्ट्रीय प्रसिद्धी माध्यमांचे लक्ष या घटनेकडे वेधले गेले होते.

या नंतर भंडारा जलद गती न्यायालयाने या प्रकरणातील आठ आरोपींना फाशीची शिक्षा सुनावली होती. मात्र, त्याला आव्हान देण्यात आले. मुंबई उच्च न्यायालयाच्या नागपूर खंडपीठाने यातील आठ आरोपींना जन्मठेपेची शिक्षा सुनावली होती. त्यातील एका आरोपीचा मृत्यू झाला आहे. हे प्रकरण सर्वोच्च न्यायालयात प्रलंबित असतानाच या घटनेचे साक्षीदार भैय्यालाल भोतमांगे यांचे निधन झाले. त्यामुळे न्यायाविनाच भोतमांगे कुटुंबाने जगाचा निरोप घेतला. जातीय द्वेष आणि जातीय वर्चस्व यातून ही अमानुष घटना घडली होती.

आजही भारताच्या अनेक भागांत स्त्री अत्याचार, जातीयवाद आणि त्यातून होणाऱ्या हत्या हा समाजापुढे मोठा प्रश्न आहे. अशा जातीय वर्चस्वातून आणि मानसिकतेतून आजही हल्ले, हत्या होत आहेत. खैरलांजीनंतर दलितांची, आदिवासींची काही परिस्थिती सुधारलेली आहे का ? तर त्याचे उत्तर नाही हेच आहे. खैरलांजीनंतर सुद्धा देशात अशा अत्याचाराच्या घटना मोठ्या प्रमाणात घडल्या आहेत. या नंतर अनेक मोर्चे, आंदोलने झाली. मात्र अनेक प्रकरणे न्यायाविनाच दाबली गेली. तेव्हा स्वतंत्र भारतात दलित, आदिवासी, मुस्लिम, ओबीसी सुरक्षित आहेत का? त्यामुळे अन्याय अत्याचाराची प्रकरणे पाहता आपल्या या भारताचे खरेखुरे नावं खैरलांजी आहे काय?