दिवाळीच्या धामधुमीत प्रवाशांची रेल्वे स्टेशनवर दोन किलोमीटरपर्यंत लांबच लांब रांग!
सुरत/उधना रेल्वे स्टेशनवर गावी जाण्यासाठी हजारो चाकरमान्यांची गर्दी; गुजरात ते बिहार मार्गावर प्रचंड हाल
सुरत: दिवाळी आणि छठ पूजेच्या निमित्ताने आपल्या मूळ गावी जाणाऱ्या प्रवाशांमुळे पश्चिम रेल्वेच्या सुरत आणि उधना रेल्वे स्थानकांवर (गुजरात) अभूतपूर्व गर्दी झाली आहे. गावी जाण्याची ओढ लागलेल्या हजारो चाकरमान्यांनी रेल्वे पकडण्यासाठी अक्षरशः मैदानापासून ते स्टेशनपर्यंत लांबच लांब रांगा लावल्याचे चित्र पाहायला मिळाले. ही रांग तब्बल दोन किलोमीटरपर्यंत पसरली होती, ज्यामध्ये महिला, लहान मुले आणि वृद्ध प्रवासीही मोठ्या संख्येने तासन्तास उभे होते.
गावी जाण्यासाठी १२ तास आधीपासून रांगेत:
गुजरातमध्ये (Gujarat) काम करणारे आणि विशेषतः उत्तर प्रदेश, बिहार, झारखंड (Bihar) आणि इतर राज्यांमध्ये जाण्यास उत्सुक असलेले हजारो मजूर व कामगार दिवाळी साजरी करण्यासाठी कुटुंबाकडे परतत आहेत. उधना रेल्वे स्टेशनवर (Udhna Railway Station) शनिवारी रात्रीपासूनच प्रवाशांनी गर्दी करण्यास सुरुवात केली. अनेकांना रात्रीपासूनच रांगेत उभे राहावे लागले. प्लॅटफॉर्म क्रमांक ६ पासून प्रवाशांची रांग लिम्बायत परिसरापर्यंत (Limbayat area) पोहोचली होती.
विशेष रेल्वे गाड्याही खचाखच भरलेल्या:
रेल्वे प्रशासनाने प्रवाशांची गैरसोय टाळण्यासाठी विशेष गाड्या (Special Trains) चालवल्या असल्या तरी, प्रवाशांची प्रचंड संख्या पाहता या गाड्यांनाही प्रचंड गर्दी झाली. प्रवाशांना आपला नंबर येण्यासाठी तासन्तास वाट पाहावी लागली, ज्यामुळे अनेकांना मनस्ताप सहन करावा लागला.
सुरक्षेसाठी विशेष व्यवस्था:
या गर्दीमुळे कोणतीही अनुचित घटना घडू नये यासाठी रेल्वे, रेल्वे सुरक्षा दल (RPF) आणि स्थानिक पोलिसांनी विशेष व्यवस्था केली आहे. प्रवाशांच्या सोयीसाठी अतिरिक्त तिकीट खिडक्या उघडण्यात आल्या असून, पाणी आणि इतर आवश्यक सुविधा पुरवल्या जात आहेत. गर्दी नियंत्रित करण्यासाठी वरिष्ठ अधिकारी स्वतः लक्ष ठेवून आहेत.