पँथर आर्मी स्वराज्य क्रांती सेने’ची मुख्यमंत्र्यांकडे मोठी मागणी; साताऱ्यातील डॉक्टर प्रकरणाची सखोल चौकशी व्हावी, तपासाची प्रगती जनतेसमोर मांडा

‘पँथर आर्मी स्वराज्य क्रांती सेने’ची मुख्यमंत्र्यांकडे मोठी मागणी; साताऱ्यातील डॉक्टर प्रकरणाची सखोल चौकशी व्हावी, तपासाची प्रगती जनतेसमोर मांडा
सातारा/मुंबई: साताऱ्यातील डॉक्टर संपदा मुंडे आत्महत्या (Satara Doctor Sampada Munde Suicide Case) प्रकरणाने राज्यभरात खळबळ उडवून दिली असताना, आता सामाजिक संघटनांनी या प्रकरणात सक्रिय भूमिका घेतली आहे. पँथर आर्मी स्वराज्य क्रांती सेनेचे संस्थापक प्रमुख संतोष एस. आठवले यांनी थेट मुख्यमंत्री (CM of Maharashtra) आणि सातारा जिल्हाधिकारी यांना निवेदन देत, तातडीने कठोर कारवाई करण्याची मागणी केली आहे.
संस्थेने आपल्या निवेदनात प्रामुख्याने दोन महत्त्वाच्या मागण्या केल्या आहेत:
१. विशेष सरकारी वकील आणि सहाय्यक वकिलांची नियुक्ती:
पँथर आर्मी स्वराज्य क्रांती सेनेने मागणी केली आहे की, या गुन्ह्याचा खटला प्रभावीपणे चालवण्यासाठी विशेष सरकारी वकिलांची (Special Public Prosecutor) तातडीने नियुक्ती करावी. तसेच, त्यांच्या मदतीसाठी सहाय्यक विशेष सरकारी वकिलांची देखील तात्काळ नियुक्ती करण्याचे आदेश देण्याची मागणी करण्यात आली आहे.
२. तपासाची प्रगती जनतेसमोर मांडा:
या प्रकरणातील पारदर्शकता राखण्यासाठी संस्थेने मागणी केली आहे की, गुन्ह्याच्या तपासाच्या प्रगतीबाबत तपासी अधिकारी आणि पोलीस अधीक्षक, सातारा यांनी वेळोवेळी पत्रकार परिषद (Press Conference) घ्यावी आणि सर्व अद्ययावत माहिती प्रसारमाध्यमांना व महाराष्ट्रातील जनतेला द्यावी.
३. भयमुक्त वातावरण निर्माण करा:
या निवेदनात साताऱ्यातील शासकीय कर्मचाऱ्यांवरील कथित राजकीय दबावावरही लक्ष वेधण्यात आले आहे. “फलटण तालुक्यातील सर्व शासकीय अधिकारी व कर्मचारी राजकीय दबावात काम करत असल्याचे दिसत आहे,” असे नमूद करत, मुख्यमंत्री आणि जिल्हाधिकारी यांनी सातारा जिल्ह्यातील सर्व अधिकारी-कर्मचारी यांना ‘भयमुक्त वातावरणात व कोणत्याही दबावाशिवाय काम करण्याकरिता प्रोत्साहन’ देण्याची मागणी केली आहे.
डॉ. संपदा मुंडे यांच्या आत्महत्येने महिलांच्या सुरक्षेचा आणि प्रशासनातील स्वच्छतेचा प्रश्न पुन्हा ऐरणीवर आणला आहे. पँथर आर्मी स्वराज्य क्रांती सेनेने मुख्यमंत्री आणि संबंधित उच्च अधिकाऱ्यांनी या निवेदनाची तात्काळ दखल घेऊन न्याय व सत्य प्रस्थापित करण्यासाठी कठोर निर्देश द्यावेत, अशी अपेक्षा व्यक्त केली आहे.
या निवेदनाची प्रत गृहमंत्री, पोलीस महासंचालक, विभागीय आयुक्त (पुणे), जिल्हाधिकारी आणि पोलीस अधीक्षक (सातारा) यांना माहिती व योग्य कार्यवाहीसाठी पाठवण्यात आली आहे.

• वृत्तसंस्था