हुपरी / प्रतिनिधी:
पर्यावरण संवर्धन, शिक्षण प्रसार, क्रीडा क्षेत्र आणि अविरत लोकसेवेच्या माध्यमातून समाजात आदर्श निर्माण करणारे हुपरी नगरपालिकेचे धडाडीचे नगरसेवक आणि बेडगे तालीमचे वस्ताद पैलवान दीपक मधुकर बेडगे यांना यंदाचा प्रतिष्ठित ‘शाहू प्रेरणा राष्ट्रीय पुरस्कार’ प्रदान करून सन्मानित करण्यात आले. ‘परिवर्तन फाउंडेशन’ आणि ‘शाहू प्रेरणा राष्ट्रीय पुरस्कार निवड समिती’च्या वतीने हा गौरव करण्यात आला आहे.
सामाजिक व क्रीडा क्षेत्रातील योगदानाचा गौरव
पैलवान दीपक बेडगे यांनी हुपरी आणि परिसरामध्ये वंचित व दुर्बल घटकांना आधार देण्यासोबतच आरोग्य सेवा, स्वच्छता अभियान, रक्तदान शिबिरे, युवा मार्गदर्शन आणि महिला सबलीकरण अशा चौफेर उपक्रमांतून मोठी कामगिरी केली आहे. राजर्षी छत्रपती शाहू महाराजांच्या विचारांचा वारसा पुढे चालवत त्यांनी केलेल्या या भरीव लोकसेवेची दखल घेऊन त्यांना सन्मानपत्र व स्मृतीचिन्ह देऊन गौरविण्यात आले.
मान्यवरांची प्रमुख उपस्थिती
हा पुरस्कार सोहळा अत्यंत उत्साहात पार पडला. याप्रसंगी पँथर आर्मीचे प्रमुख संतोषदादा आठवले, महाराष्ट्र सोशल फेडरेशनचे संस्थापक अध्यक्ष नितीनभाऊ घावट, परिवर्तन फाउंडेशनचे संस्थापक अमोल कुरणे, तसेच समीर विजापुरे, अक्षय कदम, अभिषेक कांबळे, राज भिसे आदी प्रमुख मान्यवर आणि पदाधिकारी उपस्थित होते.
सर्व स्तरातून अभिनंदनाचा वर्षाव
दीपक बेडगे यांना मिळालेल्या या बहुमानाबद्दल हुपरीसह कोल्हापूर जिल्ह्यातील क्रीडा, राजकीय आणि सामाजिक क्षेत्रातील दिग्गजांकडून त्यांचे मनापासून अभिनंदन केले जात आहे. शाहू महाराजांच्या पुरोगामी विचारांनी प्रेरित होऊन समाजकार्य करणाऱ्या एका खऱ्या जनसेवकाला हा पुरस्कार मिळाल्याने कार्यकर्त्यांमध्ये कमालीचा उत्साह आणि आनंदाचे वातावरण आहे.
