मुंबई : महाविकास आघाडीसोबत हातमिळवणी करण्याचं विधान एमआयएमचे खासदार इम्तियाज जलिल यांनी केलं आहे. इम्तियाज जलील यांच्या या ऑफरनंतर राजकीय वर्तुळाच चर्चांना उधाण आले आहे. त्यावर आता शिवसेना खासदार संजय राऊत यांनी शिवसेनेला एमआयएमने आघाडीसाठी दिलेली ऑफर हा भाजपचा कट आहे. शिवसेनेच्या बदनामीसाठी भाजपकडून प्रयत्न सुरू असल्याचा आरोप केला आहे.
शिवसेना पक्ष प्रमुख आणि मुख्यमंत्री उद्धव ठाकरे यांनी आज शिवसेनेच्या खासदारांना शिवसंपर्क अभियानांतर्गत’संवाद साधत मार्गदर्शन केले. शिवसेना भवनात झालेल्या या कार्यक्रमात मुख्यमंत्री उद्धव ठाकरे यांनी ऑनलाइन मार्गदर्शन केले. त्यानंतर शिवसेना खासदार संजय राऊत यांनी उद्धव ठाकरे यांनी केलेल्या मार्गदर्शनाची माहिती देण्यासाठी माध्यमांशी संवाद साधला. यावेळी संजय राऊत यांनी म्हटले की, भाजपकडून एमआयएमला आघाडीच्या ऑफरची सूचना देण्यात आली. एमआयएमची ऑफर म्हणजे भाजपचा कट आहे. शिवसेनेला बदनाम करण्यासाठी गैरसमज पसरवण्यासाठी हा खटाटोप सुरू असल्याचे राऊत यांनी सांगितले. शिवसेनेचे हिंदुत्व बदनाम करण्यासाठी भाजप प्रयत्नशील आहे.
तसेच शिवसेनेला ‘जनाब सेना’ म्हणून संबोधणाऱ्या भाजपने आपला इतिहास विसरू नये असा टोला संजय राऊत यांनी भाजपला लगावला. काश्मीरमध्ये अतिरेक्यांशी हातमिळवणी करून सरकार स्थापन करणारी भाजप आहे. मेहबूबा मुफ्तीसोबत सरकार कोणी स्थापन केले? हे फुटीरतावादी, दहशतवाद्यांसोबत असणार हा पक्ष आहे, असेही आम्ही भाजपला बजावले होते, असे यावेळी राऊत यांनी म्हटले.
